Татарстан-Япония: хезмәттәшлек үсеш ала

Татарстан җитәкчелеге республикабызны чит ил инвесторлары өчен кызыклы итү юнәлешендә зур эш алып бара. Узган атнада Рөстәм Миңнеханов җитәкчелегендәге делегациянең Япониягә сәфәре дә биредәге бизнес вәкилләрен Татарстандагы мөмкинлекләр белән таныштыру максатын йөрткән.

VI Россия-Япония инвестицион форумында Япония белән партнерлык мөнәсәбәтләрен ныгыту һәм хезмәттәшлекне үстерү юнәлешендә шактый гына мөһим килешүләр дә имзаланган. Делегатлар энергияне сак тоту, автомобиль сәнәгате һәм инновацияләр мәсьәләсендә фикер алышкан. Шулай ук медицина, транспорт һәм инфраструктура өлкәләрендә илләр арасындагы багланышлар да каралды, дип сөйләде Татарстан Инвестицион үсеш агентлыгы җитәкчесе Линар Якупов.

Хуш киләсез, инвесторлар

Япония бизнесы Мәскәү, Санкт-Петербургтагы эшчәнлеге белән генә чикләнмичә, бөтен Россия базарына актив рәвештә керергә тиеш дип билгеләгән Татарстан Президенты Рөстәм Миңнеханов. Аның сүзләренчә, Россия-Япония инвестицион форумы Россия төбәкләренә үзләрен күрсәтү өчен киң мөмкинлекләр ача.

Татарстан да инвесторларны уңайлы шартлар белән тәэмин итә ала. Президент республикабызда үз эшен җайлап җибәрергә теләгән бизнес вәкилләренә алга киткән инфраструктура, җир кишәрлекләре, эшләнгән юл карталары, югары һөнәри белемле персонал, шулай ук республика хөкүмәте тарафыннан максималь игътибар вәгъдә иткән.

Республика башлыгы билгеләп киткәнчә, Татарстан һәм Япония хезмәттәшлеге, нигездә, нефть химиясе, нефть эшкәртү, машина төзелеше өлкәләрендә җәелдерелә. Терлек асрау, авыл хуҗалыгы продукциясен эшкәртү исә икеяклы отышлы партнерлык өчен яңа үсеш юнәлеше була ала дип билгеләнгән.

Туган якның газизлеге онытылмый

Япониягә эш сәфәре вакытында Татарстан Президенты Рөстәм Миңнеханов Япониядә яшәүче милләттәшләребез белән дә очрашты. Очрашу 1938 елда татарлар нигез салган Токио мәчетендә узган.

Токиода яшәүче 90 кешелек зур булмаган этник төркем бер-берсе белән даими аралашып тора — алар мәчеткә йөриләр, туган җирдән килгән яңалыклар белән кызыксыналар. Очрашуда Рөстәм Миңнеханов милли үзаңны саклап калу җиңел булмавын билгеләп, республика җитәкчелеге ватандашлар белән багланышларны югалтмау өчен күрелгән чаралар турында сөйләгән. "Ана теле" татар телен он-лайн өйрәнү проекты гамәлгә ашырыла, "ТНВ-Планета" телеканалы эшли, читтә яшәүче милләттәшләрне Бөтендөнья татар конгрессы кайгыртып тора.

- Кая яшәвебезгә карамастан, без үз милләтебез, динебез, мәдәниятыбыз кешеләре белән ныклы элемтәдә булырга тиеш. Гореф-гадәтләрне, туган телебезне саклап калу, яшьләрне тарихыбызны, мәдәниятыбызны ихтирам итәргә өйрәтү бик әһәмиятле, - дип белдергән Рөстәм Миңнеханов.