Инкубаторлардан алып GPS-янчыкларга кадәр: Татарстан мәктәп укучылары “Мәктәп бизнес-старты” финалында бизнес-идеяләрне тәкъдир иттеләр
“Мәктәп бизнес-старты” проектының финал слеты бөтен республикадан 120 яшь эшмәкәрне җыйды һәм традицияләрне сакчыл яңартудан алып кыю технологик карарларга кадәр чын идеяләр ярминкәсенә әверелде. Финалга Казан, Минзәлә, Буа, Кама Тамагы, Теләче, Тәтеш, Бөгелмә һәм Сарман районнарыннан 12 команда килеп җитте. Проектларның икътисадый өлешен яклауда укучылар исәпләүләр генә түгел, креативлык, базарны тоя белү һәм тиз җайлашу сәләтен дә күрсәттеләр.
Идеяләр гаҗәеп иде:
Традицияләр һәм һөнәрләр: татар тематикасында печенье, Минзәлә җиләк-җимешеннән как, “Милли Код” бизәкле кием һәм аксессуарлар, мамык уенчыклар;
Экология һәм кул хезмәте: эко-шоперлар, гипс һәм ташланган күн әйберләр, GPS-трекерлы сумка-янчык, стильле аксессуарлар;
Технологияләр һәм үсеш: балалар белән шөгыльләнү өчен мини-робот-манипуляторлар (координация, сенсорика, моторика), SkillBrilliant трекер-боксы, презентацияләр өчен программалар һәм шаблоннар булдыру;
Авыл бизнес идеяләре: инкубаторда чебиләр үрчетү, экологик продукция җитештерү һәм сату.
Гамәлдәге эшмәкәрләрдән торган жюри бизнес-планның оригинальлеген, реалистик булуын, потенциаль табышлылыгын һәм һәр проектның социаль әһәмиятен бәяләде.
Слет йомгаклары буенча номинацияләрдә җиңүче өч команда билгеләнде:
“Үзебезнең ил җитештерүчеләре” - Минзәлә шәһәренең 2 нче урта гомуми белем бирү мәктәбе (җиләк-җимештән как ясау һәм сату);
“Елның алгарышы” - Буа районының академик Р.З. Сәгъдиев исемендәге урта гомуми белем бирү мәктәбе;
“Киләчәк бизнесы” - Сарман районының 2 нче Җәлил урта гомуми белем бирү мәктәбе.
Быел ук җиңүчеләр Мәскәүгә юл тотачак - сәфәр программасында "Сколково” технопаркы һәм башка әһәмиятле мәйданчыклар бар.
Бизнесны үстерүгә сертификатларны Сарман районының 2 нче Җәлил урта гомуми белем бирү мәктәбе һәм Казанның Яңа Савин районының 146 нчы лицее алды.
Оештыручылар ышана: “Мәктәп бизнес-старты” Татарстанның иң ерак почмакларыннан талантлы балаларга юл ачып, көчәя баруын дәвам итәчәк. Алынган күнекмәләр - финанс грамоталылыгыннан алып идеяне ачыктан-ачык яклый белүгә кадәр - киләчәктә нинди генә һөнәр сайласалар да, катнашучылар өчен ышанычлы нигез булачак.
Наталья Кондратова, Татарстан икътисад министрының беренче урынбасары - Эшмәкәрлекне үстерү департаменты директоры:
“Мәктәп бизнес-старты” проекты республика Рәисе кушуы буенча инде өченче ел гамәлгә ашырыла һәм 2022-2025 еллар чорында 45 300 укучыны колачлады, шуларның 21 000 нән артыгы - кече шәһәр һәм авыллардан. Уен форматында балалар финанс грамоталылыгы һәм эшмәкәрлек фикерләве нигезләрен үзләштерәләр, идеяләрне тәкъдим итәргә, командада эшләргә һәм экспертлар алдында проектларны якларга өйрәнәләр. Әмма иң мөһиме - алар реаль эшлекле тәҗрибә ала, ул аларга аңлы рәвештә һөнәри траекторияне сайларга ярдәм итә, ә күпләр өчен үз бизнес-идеяләрен эшләтеп җибәрүгә этәргеч була. Мондый алым киләчәктә республика икътисадының тотрыклы үсешен тәэмин итәргә сәләтле кадрлар резервын формалаштыра".
Татьяна Алексеева, Татарстан Республикасы Мәгариф һәм фән министрлыгының гомуми белем бирү идарәсе башлыгы:
“Безнең өчен мәктәп бизнес-старты аеруча кыйммәтле” балаларга үз пробасына, хатасына һәм яңа омтылышына хокук бирә. Бу өстәмә белем генә түгел - бу яшүсмер карарлар кабул итәргә, командада эшләргә һәм җаваплылыктан курыкмаска өйрәнә торган мохит. Безнең өчен мондый системалы эшнең хәтта иң кечкенә торак пунктларны да колачлавы һәм һәр балага тигез мөмкинлекләр бирүе аеруча кыйммәтле”.
“Мәктәп бизнес-старты” - Татарстан Республикасы Рәисе Рөстәм Миңнеханов кушуы буенча гамәлгә ашырыла торган уникаль республика проекты. Оештыручы: ТР Икътисад министрлыгы ТР Мәгариф һәм фән Министрлыгы һәм “Минем бизнес” үзәге ярдәмендә. Программа 5-7 сыйныф укучыларында, шул исәптән авыл мәктәпләрендә һәм кече шәһәрләрдә эшмәкәрлек күнекмәләрен формалаштырырга ярдәм итә. Проект “Нәтиҗәле һәм конкурентлы икътисад” милли проекты кысаларында гамәлгә ашырыла.