Мидхәт Шаһиәхмәтов эш визиты белән Апас районына килде
Бүген, 2026 елның 4 февралендә, Татарстан Республикасы Премьер-министры урынбасары - икътисад министры Мидхәт Шаһиәхмәтов эш визиты белән Апас муниципаль районына килде.
Визит программасы кысаларында министр берничә төп объектта булды. Алар арасында - заманча авыл хуҗалыгы һәм җитештерү предприятиеләре, район гаиләләре өчен яңа торак йорт. Бу объектлар территориянең комплекслы үсешен күрсәтә: яңа технологияләр кертүдән һәм кече бизнеска ярдәм итүдән алып халыкның яшәү шартларының сыйфатын яхшыртуга кадәр.
Район Советының хисап сессиясендә чыгыш ясап, Мидхәт Шаһиәхмәтов билгеләп үткәнчә, Татарстан узган ел йомгаклары буенча икътисадый үсешнең югары темпларын саклап калды һәм Рәсәй төбәкләре арасында тотрыклы рәвештә алдынгы урыннарда тора. Апас районы шулай ук республика үсешенә үз өлешен кертте.
Районда махсус хәрби операциядә катнашучыларның гаиләләренә ярдәм итүгә, социаль инфраструктураны үстерүгә аерым игътибар бирелә - узган елда күп кенә мәгариф, медицина һәм мәдәният объектлары төзелде һәм капиталь ремонтланды.
Татарстан Республикасы Икътисад министрлыгы халыкның тормыш сыйфатын яхшырту эшен дәвам итәчәк.