Мидхәт Шаһиәхмәтов эш визиты белән Спас муниципаль районында булды

Бүген Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов эш визиты белән Спас муниципаль районында булды. Визит программасына авыл хуҗалыгы һәм туристлык тармагының кайбер объектларын карау, шулай ук муниципалитетның социаль-икътисадый үсеш перспективалары турында фикер алышу кертелгән иде.

Сәфәр барышында Мидхәт Шаһиәхмәтов Өч Күл авылындагы “Camelrusia»” дөя фермасында, “Ибне Фадлан” кунакханә комплексында, “АГРОФИРМА 16” ҖЧҖнең ит комбинатында булды, шулай ук район территориясендә җитештерелә торган продукция күргәзмәсе белән танышты. Министр җитәкчеләр белән очрашты, икътисадны алга таба үстерү һәм халыкны эш белән тәэмин итү өчен локаль проектларның әһәмиятен билгеләде.

Спас муниципаль районы Советының “2025 елда районның социаль-икътисади үсеш йомгаклары һәм 2026 елга бурычлар турында” йомгаклау утырышында чыгыш ясаганда, министр, тышкы кыенлыкларга карамастан, республика икътисады үсүен дәвам итә, ә район агросәнәгать комплексында һәм социаль программаларны гамәлгә ашыруда яхшы күрсәткечләр күрсәтә, дип билгеләп үтте. Махсус хәрби операциядә катнашучыларга һәм аларның гаиләләренә ярдәм итү, кече һәм урта бизнесны үстерү, шулай ук милли проектларны киңәйтү, инвестицион эшчәнлек һәм инфраструктураны модернизацияләү мәсьәләләренә аерым игътибар бирелде.

Районга визитын тәмамлап, Мидхәт Шаһиәхмәтов үзенең мөрәҗәгатендә шулай ук Спас районы икътисадының үсеш ноктасы туризм тармагы булуын билгеләп үтте.

“Ышанам ки, туризм район икътисадын алга таба диверсификацияләү, җирле бюджет керемнәрен үстерү һәм, иң мөһиме, кешеләрнең тормыш сыйфатын яхшырту өчен төп резервларның берсе булып кала. Районның бурычы - бу потенциалны максималь файдалану, кунакларның күп көнлек килүе һәм объектларның ел әйләнәсендә эш белән тәэмин ителеше өчен шартлар тудыру”, - дип ассызыклады Мидхәт Шаһиәхмәтов.