Мидхәт Шаһиәхмәтов Бәһрәйндә ислам банкингы һәм финанслары буенча 20 нче еллык конференциядә чыгыш ясады
Татарстан Республикасы Премьер-министры урынбасары, Татарстан Республикасы икътисад министры Мидхәт Рәфкать улы Шаһиәхмәтов Манамада (Бәһрәйн Корольлеге) уза торган ислам банкингы һәм финанслары буенча 20 нче еллык конференция ачылышында сәламләү сүзе белән чыгыш ясады.
Конференция «Ислам финансларының ясалма интеллекты һәм трансформациясе» темасына багышланды. Цифрлы технологияләрнең, аерым алганда, ЯИ партнерлык финанславы үсешен тизләтүе, продуктларның һәркем файдалана алуын арттыруы һәм шәригать принципларына туры килүне көчәйтүе турында фикер алышалар.
Мидхәт Шаһиәхмәтов үзенең чыгышында: «AAOIFI еллык конференциясендә катнашу безнең өчен күркәм традициягә әверелә һәм ныклы партнерлык мөнәсәбәтләре урнаштыру өчен нигез булып тора. Россия Федерациясен ислам дәүләтләре белән гадәттәгечә тыгыз, ышанычлы мөнәсәбәтләр бәйли – ике яклы линия буенча да, шулай ук Татарстан Республикасы Рәисе Миңнеханов Рөстәм Нургалиевич җитәкләгән Ислам хезмәттәшлеге оешмасы белән хезмәттәшлек кысаларында да». Ул искәрткәнчә, Татарстан Республикасы ислам финанславы принципларын кертү буенча Россия регион-пилотларының берсе булып тора: «417нче федераль закон кабул ителү нәтиҗәсендә Россиядә ислам финансларын торгызу һәм аларны халыкара стандартлар белән интеграцияләү өчен хокукый нигезләр формалаштырылды».
Моннан тыш, Мидхәт Шаһиәхмәтов үзенең чыгышында Россиядә һәм Татарстанда ясалма интеллект үсешенең мөһимлеген дә билгеләп үтте. Ул ассызыклаганча, илдә ЯИ 2030 елга кадәрге илкүләм стратегиясе гамәлгә ашырыла, ә республикада үз проектлары — «ГосПромпт» платформасы, «Татнефть» һәм Иннополис компанияләре карарлары, шулай ук ЯИ ислам финансларының үтә күренмәлелеген арттыру өчен куллана торган Halal Card һәм RANKS системалары эшли.
Казанда AAOIFI Вәкиллек үзәген булдыру мәсьәләсе чыгышның аерым темасы булды. Министр ассызыклаганча, әлеге карар Россия базарын халыкара ислам финанслары системасы белән интеграцияләү, сертификацияләнгән белгечләр әзерләү һәм халыкара алымнар нигезендә милли стандартлар эшләү өчен яңа мөмкинлекләр ача.
Форумның пленар сессиясе кысаларында ислам банкингының глобаль үсешенә, цифрлы платформаларның һәм халыкара стандартлар белән норматив документларның интеграциясенә күзәтү белән AAOIFI Химаячеләр советы рәисе шәех Ибраһим бин Хәлифә Әл Хәлифә, Islamic Development Bank Institute генераль директоры вазыйфаларын башкаручы Сами Әл-Сувайлем, AAOIFI генераль сәркатибе Омар Мостафа чыгыш ясады. Якын Көнчыгыш һәм Азия илләренең сукук чыгару, смарт-контрактлар кертү һәм финанс секторында ясалма интеллект куллану масштаблары буенча фикер алышынды.