Татарстан мәктәп укучыларының бизнес-идеяләре: «Мәктәп бизнес-старты» проектында җиңүче өч команда билгеләнде
Мәктәп бизнес-компанияләренең республиканың төрле почмакларыннан 120 яшь эшкуарны җыйган финал слеты укучылар арасында бизнес-проектлар булдыру буенча дәвамлы эшнең кульминациясе булды.
Уку елы дәвамында әлеге проект кысаларында республиканың төрле шәһәр һәм районнарыннан 11 меңнән артык бала махсус программа буенча эшкуарлык нигезләрен өйрәнде, бизнес-семинарларда һәм мәктәп хәйрия ярминкәсендә катнашты, үз проектларын тәкъдир итте, эшкуарлар үз эшчәнлекләрендә очраша торган реаль бизнес-кейсларны хәл итте һ.б.
Нәтиҗәдә, республиканың 18 районыннан урта мәктәп яшендәге 11 мең бала арасыннан финалга 120 бала килеп җитте, алар проектның барлык этапларын да уңышлы узды. Алар – Казаннан 12 бизнес-компания һәм Татарстанның 9 районыннан.
Финал слетында балалар үз проектларының икътисадый өлешен тәкъдим итеп, креативлык, инновацион якын килү һәм базар шартларына яраклаша белүләрен күрсәттеләр. Тәкъдир ителгән бизнес-идеяләр арасында үзләре җитештергән товарлар: утны кире кайтара торган элементлы шоперлар, кулдан эшләнгән сабын һәм бизәнү әйберләре, үлән чәйләре һәм сувенирлар, йорт хайваннары өчен аксессуарлар, ротангтан ясалган декор һәм башкалар тәкъдим ителде.
Бизнес вәкилләреннән торган жюри проектларны берничә критерий буенча бәяләде: идеянең оригинальлеге, бизнес-планның чынбарлыкка туры килүе, потенциаль табышлылык һәм социаль әһәмиятлелек.
Финал слеты йомгаклары буенча төрле номинацияләрдә җиңүчеләрнең 3 командасы билгеләнде:
«Үзебезнең ил җитештерүчеләре» - 182 нче лицей, Казан (табигый кабак цукатлары һәм үлән чәе ясау);
«Ел алгарышы» - Алабуга муниципаль районының 8 нче урта белем бирү мәктәбе (сәйләннән бизәнү әйберләре һәм аксессуарлар ясау);
«Киләчәк бизнесы» - «Җәлил гимназиясе» МБМУ (индивидуаль чигүле экологик шоперлар җитештерү).
Җиңүче командалар быел җәй Мәскәүгә барачак. Сәфәр планына «Сколково» технопаркында булу һәм башка кызыклы урыннарда булу кертелгән.
Финал слетын йомгаклап, оештыручылар «Мәктәп бизнесы старты» проектының алга таба да үсәчәгенә, географияне киңәйтәчәгенә һәм талантлы укучыларны җәлеп итәчәгенә ышаныч белдерделәр. Алар ассызыклаганча, яшьләр эшкуарлыгына ярдәм төбәкнең икътисадый үсешендә мөһим фактор һәм киләчәктә аның чәчәк атуына нигез булып тора. Катнашучылар, сайлаган һөнәрләренә карамастан, киләчәктә кирәк булачак кыйммәтле күнекмәләргә ия булалар.
Шулай ук проектта катнашучылар Россия эшкуарлыгы көненә багышланган #МСПСпасибо акциясенә кушылдылар һәм республика бизнесына проектка ярдәм иткәннәре, остазлыклары һәм балаларны эшлекле күнекмәләргә өйрәткәннәре өчен рәхмәт белдерделәр. Исегезгә төшерәбез, РФ Икътисадый үсеш министрлыгы һәм КУЭ корпорациясе инициативасы Россия эшкуарлыгын үстерү, аның ил икътисадына саллы өлеш кертүе мәсьәләләренә игътибарны җәлеп итәргә тиеш.
Татарстан икътисад министрының беренче урынбасары һәм Эшкуарлыкны үстерү департаменты директоры Наталья Кондратова сүзләренчә, «Мәктәп бизнесы старты» проекты Татарстанда инде өченче ел республика Рәисе кушуы буенча гамәлгә ашырыла. Программа, зур булмаган торак пунктларны да кертеп, барлык почмаклардан укучыларны колачлый - анда 34 меңнән артык укучы катнашкан. Балалар уен форматында командаларда үз проектларын үстерү һәм тышкы аудитория алдында яклау өчен эшкуарлык фикерләү күнекмәләре, презентацияләр, аргументацияләр, планлаштырулар, барлык кирәкле күнекмәләр һәм компетенцияләр алалар, бу киләчәктә төбәк икътисадына уңай йогынты ясаячак һәм кадрлар резервы үсешенә ярдәм итәчәк.
Татарстан Республикасы мәгариф һәм фән министры Илсур Һадиуллин:
«Мәктәп бизнесы старты» кебек проектлар балаларга өстәмә белем һәм күнекмәләр бирергә тиеш. Бүген мобильлек, креатив фикерләүгә ия булу, төгәл һәм тиз карарлар кабул итү бик мөһим. Мондый проектлар балада талантларны ачарга ярдәм итә. Һәм яшь буынны заманча икътисадта кирәкле эшкуарлык күнекмәләренә өйрәтә алырлык проектлар һәм кешеләр булуы бик мөһим».
Салихов Айдар Рәиф улы, «ТР Эшкуарлыкка ярдәм фонды» МКК КО генераль директоры:
«Балаларны эшкуарлык эшчәнлеге нигезләренә хәзердән үк өйрәтергә кирәк, үз эшләрен ачу вакытына алар үз идеяләрен уңышлы тормышка ашыру өчен белемгә ия булсыннар иде. «Мәктәп бизнес старты» проекты яшь буынны укытуда һәм үстерүдә мөһим роль уйный, аларга эшкуарлык өлкәсендә кыйммәтле күнекмәләр һәм белемнәр бирә. Без ышанабыз, әлеге проект ярдәмендә Татарстан Республикасында якын араларда эшкуарлык активлыгының сизелерлек үсеше күзәтеләчәк, бу үз чиратында төбәк икътисадын ныгытуга һәм яхшыртуга ярдәм итәчәк».
«Мәктәп бизнес старты» – Татарстан Республикасы Рәисе Рөстәм Миңнеханов йөкләмәсе нигезендә гамәлгә ашырыла торган уникаль республика проекты. Аны ТР Мәгариф һәм фән министрлыгы һәм «Минем бизнес» үзәге ярдәмендә ТР Икътисад министрлыгы оештыра. Проект 5-7 сыйныф балаларында, шул исәптән Татарстан Республикасының авыл мәктәпләрендә һәм кече шәһәрләрендә укучыларда эшкуарлык күнекмәләрен формалаштырырга ярдәм итә. Проект «Нәтиҗәле һәм конкурентлы икътисад» илкүләм проекты кысаларында гамәлгә ашырыла.