Ютазы районында 2024 елга йомгак ясалды һәм агымдагы елга бурычлар билгеләнде
Хисап сессиясендә ТР вице-премьеры – икътисад министры Мидхәт Шаһиәхмәтов катнашты.
Эш сәфәре кысаларында ул районның социаль объектларында һәм предприятиеләрендә, шул исәптән Ютазы авылындагы мобиль тернәкләндерү үзәгендә, «Ансель Вафауллин» КФХ, «ТАПАРТ» МИЗ ҖЧҖ, «Урыссу» сәнәгать паркы резидентларында, 1 нче Урыссу балалар бакчасында һәм «Электросоединитель» АҖ булды.
Депутатлар һәм район советы әгъзалары алдында чыгыш ясаганда Шаһиәхмәтов елның мөһим вакыйгаларын билгеләп үтте һәм район җитәкчелегенә һәм халкына МХО катнашучыларга ярдәмнәре өчен рәхмәт белдерде.
Мидхәт Шаһиәхмәтов билгеләп үткәнчә, барлык авырлыкларга да карамастан, республика тотрыклы үсешен дәвам итә. "Беренче тапкыр тулай төбәк продукты күләме 5 трлн сумнан артып китте. Татарстан авыл хуҗалыгы продукциясе җитештерү, төзелеш һәм инвестицияләр буенча илдә алдынгы урында тора. Ютазы районы республика үсешенә зур өлеш кертә. Предприятиеләр җитәкчелегенә һәм хезмәт коллективларына профессиональлекләре һәм эшкә бирелгәнлекләре өчен рәхмәт белдерәм. Безнең уртак бурыч — милек формасына карамастан, барлык предприятиеләрнең өзлексез эшләвен тәэмин итү", - дип ассызыклады ул.
Утырыш төрле өлкә хезмәткәрләрен бүләкләү тантанасы белән тәмамланды.