Мидхәт Шаһиәхмәтов Мамадыш районының сәнәгать парклары эшчәнлеге белән танышты
Бүген Татарстан Республикасы вице-премьеры – Татарстан Республикасы икътисад министры Мидхәт Шаһиәхмәтов эш визиты белән Мамадыш районына килде. Визит барышында ул районның җитештерү предприятиеләре эшчәнлеге белән танышты, предприятиеләр җитәкчеләре һәм сәнәгать парклары резидентлары белән очрашты.
Муниципалитет предприятиеләрен карауны министр «Вятка» сәнәгать паркына барудан башлады, анда ул резидент производстволарын, шул исәптән быел эшләтеп җибәрүгә әзерләнә торган яңа проектларны карады. Алар арасында «Парма» ҖЧҖ, «Родные края» («Туган яклар») ҖЧҖ, «Тиитвуд» ҖЧҖ, «Реком» ҖЧҖ һәм «Меркатор» ҖЧҖ бар.
«Реком» ҖЧҖ директоры Евгений Шунгаров озатуында министр июль аенда картон чыгару планлаштырылган мәйданчыкны карады. Ватан үрнәгендәге җиһазлар сатып алынган инде. Аннары Мидхәт Шаһиәхмәтов минераль су һәм Coca-cola эчемлекләре җитештерү белән шөгыльләнәчәк «Парма» ҖЧҖ мәйданчыгын карады.
Беренче этапларда хезмәткәрләр штаты 15 кешегә җитәчәк. Барлыгы 60 яңа эш урыны булдыру планлаштырыла. Шул ук вакытта белгечләр Татарстаннан гына түгел, Ираннан да алыначак. Производствоны агымдагы елның сентябрендә эшләтеп җибәрү планлаштырыла.
«Бизнес белән аралашу ярдәмендә сыйфатлы җавап алу мөмкин. Районга сәфәр барышында алынган мәгълүмат, кече һәм урта бизнес вәкилләренең ихтыяҗларын һәм теләкләрен исәпкә алып, ярдәм чараларын эшләп бетерү өчен кулланылачак. Бүген без Мамадыш районында, аерым алганда «Вятка» сәнәгать паркында булдык — бу чыннан да перспективалы проект һәм районны үстерү өчен резерв», – дип билгеләп үтте Мидхәт Шаһиәхмәтов.
Аннан соң республиканың икътисад министры «Тиидвуд» ҖЧҖдә булды, ул Себер карагаен эшкәртү белән шөгыльләнәчәк. Проект кысаларында пилораманы эшләтеп җибәрү, параллель рәвештә завод һәм склад төзү планлаштырыла. Җитәкчелек сүзләренчә, производствоны терраса һәм палуба тактасыннан башларга планлаштыралар, киләчәктә йорт төзелеше өчен продукцияне үзләштерәчәкләр.
Мамадыш районы башлыгы Анатолий Иванов озатуында Мидхәт Шаһиәхмәтов шулай ук «Сельхозтехника» сәнәгать паркын карады, анда «ТПК техноком» ҖЧҖнең металл торбалар җитештерү буенча яңа заводында булды.
«Вятка» сәнәгать паркының мәйданы 80 гектар җир тәшкил итә, шуңа күрә кече һәм урта бизнесны үстерү өчен резервлар зур. Минемчә, быел парк өчен хәлиткеч ел булачак, чөнки 2023 елда берничә проектны эшләтеп җибәрү планлаштырыла. Моның өчен барлык шартлар да тудырылган – инвесторларны бирегә салым ташламалары һәм башка шәһәрләр белән чагыштырганда арзанлы эшче көч җәлеп итә», – дип ассызыклады район башлыгы.
Эш визиты ахырында Татарстан икътисад министры Татарстан Республикасы муниципаль берәмлекләре катнашында республика икътисадының тотрыклы үсешен тәэмин итү буенча видеоконференц элемтә режимында эшче төркем утырышын уздырды. Утырыш барышында Россия Икътисади үсеш министрлыгының Хезмәт җитештерүчәнлеге, капиталь инвестицияләрне яклау һәм кызыксындыру департаменты директоры Александр Молодцов муниципаль берәмлекләрдә төбәк инвестиция стандартын кертү буенча алып барылган эшләр турында сөйләде. Моннан тыш, Татарстанның инвестицион климатын яхшырту, шулай ук кече һәм урта эшкуарлыкка, шул исәптән «Кече һәм урта эшкуарлык» илкүләм проекты буенча федераль һәм төбәк ярдәм чараларын гамәлгә ашыру турында фикер алыштылар.