Татарстан эшкуарлары электрон сәүдә бизнес-мәктәбен узарга мөмкин
30 майда Татарстанда эш башлаучы эшкуарлар һәм үзмәшгульләр өчен Wildberries маркетплейсында эшләү буенча бизнес-мәктәпкә старт биреләчәк. Чара «Кече һәм урта эшкуарлык» милли проектын тормышка ашыру кысаларында ТР Икътисад министрлыгы карамагындагы Эшкуарлыкка ярдәм итү төбәк фондының «Минем бизнес» үзәге ярдәме белән узачак.
Чара кысаларында эшкуарлар үзләренең интернет-бизнесларын ничек уңышлы үстерү турында беләчәкләр һәм илебезнең иң эре электрон мәйданчыгында теркәлү һәм эшләү буенча кыйммәтле киңәшләр алачаклар.
«Катнашу бушлай, чөнки «мәктәп» эшкуарга маркетплейста нәтиҗәле сатуда ярдәм итүгә юнәлдерелгән һәм сату күрсәткечләрен яхшырту өчен төп факторларны аерырга, үз товарларын кирәкле итеп әзерләргә һәм тәкъдим итәргә өйрәнергә, шулай ук товарларны дөрес җибәрүне оештырырга һәм әкренләп үз бизнесын үстерергә мөмкинлек бирә», – дип сөйләде Линара Борханова, Татарстан Республикасы Эшкуарлыкка ярдәм Фонды генераль директорының беренче урынбасары – «Минем бизнес» үзәге җитәкчесе.
Чарада офертаның нәрсә икәнлеге, хезмәттәшлек, сатуны башлауга шәхси кабинетны әзерләү һәм аңа ярдәм итү өчен кирәкле документлар турында сөйләячәкләр. Катнашучылар Wildberries белән хезмәттәшлек итү модельләре һәм товарлар белән эшләү кагыйдәләре турында беләчәкләр, шулай ук сатучыларның киң таралган хаталары каралачак һәм алардан качу юллары тәкъдим ителәчәк.
Чара программасы буенча шулай ук реклама буенча эксперт чыгышы планлаштырыла, ул бренд һәм товарларны пропагандалау инструментларын тәкъдим итәчәк һәм реклама кабинетының эш тәртибен аңларга ярдәм итәчәк.
Чараны оештыручылар билгеләп үткәнчә, тәмамланганнан соң, барлык катнашучылар, шәхсән катнашып, компания экспертлары белән вакытлыча чатка чакырылачак, анда бер ай эчендә барлык килеп туган сораулар һәм сатучы буларак юлның беренче этабында авырлыкларны җиңүдә ярдәм каралачак.
Чара 30 майда 11.00 сәгатьтә Казан сәүдә институтының уку корпусының актлар залында (Даурская ур., 32, лит. А) узачак. Чарада катнашу өчен https://ano-cet.timepad.ru/event/2439749/ сылтамасы аша теркәлергә кирәк .
Исегезгә төшерәбез: «Минем бизнес» үзәге Татарстан Республикасы эшкуарлары һәм үзмәшгульләре өчен маркетплейсларга чыгу, шул исәптән маркетплейсларда товарлар урнаштыруны тәэмин итү, маркетплейсларда эшләү буенча квалификация күтәрү, «Кече һәм урта эшкуарлык» милли проектын гамәлгә ашыру кысаларында форум-марафоннар һәм мастер-класслар үткәрү буенча комплекслы ярдәм күрсәтә. Татарстан Республикасы эшкуарлары маркетплейсларга чыгу мөмкинлекләре турында тулырак «Минем бизнес» үзәгенең кайнар линия номеры аша белә ала: 8(843)524-90-90.