Рөстәм Сибгатуллин Арча һәм Биектау районнарында сәнәгать паркларында булды
Татарстан икътисад министрының беренче урынбасары Рөстәм Сибгатуллин эш визиты белән республиканың Арча һәм Биектау районнарының сәнәгать паркларында булды. Визит кысаларында Икътисад министрлыгы вәкилләре гамәлдәге һәм потенциаль резидентлар белән очрашу уздырдылар һәм сәнәгать паркларының идарәче компанияләреннән гаризалар килгән инженерлык инфраструктурасы объектларын төзү кирәклеген бәяләделәр.
«Арча» индустрия паркы 21 гектардан артык мәйдан били, анда 6 резидент урнашкан, аларның бер өлеше авыл хуҗалыгы продукциясен эшкәртү белән шөгыльләнә. Паркның бурычы – авыл хуҗалыгы продукциясен эшкәртү процессларын, кооперация схемаларын һәм район һәм якын-тирә территорияләрдәге аграрийлар продукциясен сату процессларын берләштереп җитештерүнең яңа технологик чылбырларын формалаштыру. Моннан тыш, Тимер-бетон эшләнмәләр һәм металл конструкцияләр җитештерү белән шөгыльләнүче резидентлар белән килешүләр төзелде. Резидентларның санын һәм алар төзегән эш урыннары санын арттыру өчен, объектта инженерлык һәм юл инфраструктурасы төзелеше буенча эшләр башкару таләп ителә.
«ХЭФ» индустрия паркы Биектау районында 2 гектардан артык җирдә урнашкан, аның территориясендә 6 резидент эшли. Паркта җитештерүнең тулы циклын гамәлгә ашыру өчен җитештерү һәм офис бүлмәләре бар инде, ул төбәк һәм федераль әһәмияттәге транспорт юл комплексына, шулай ук Казан шәһәренә якын урнашуы белән аерылып тора. «ХЭФ» алга киткән инженерлык инфраструктурасына ия, әмма мәйдан эчендә юллар төзү кирәк.
Исегезгә төшерәбез, сәнәгать паркларын үстерү концепциясе кысаларында резидентлар эшчәнлеген алып баруның уңайлы шартларын тудыру өчен, муниципаль районнарда урнашкан аккредитацияләнгән сәнәгать парклары өчен кирәкле инженерлык инфраструктурасын булдыру һәм модернизацияләү буенча ТР Икътисад министрлыгы тарафыннан яңа программа эшләнде.
Шулай ук Рөстәм Сибгатуллин әлеге сәнәгать паркларының гамәлдәге һәм потенциаль резидентлары белән дә очрашты, анда тагын бер кат алар өчен гамәлдәге ярдәм чаралары – салым ташламалары, кредитлар, микрозаймнар, субсидияләү программалары турында әйтте. Очрашуда шулай ук санкция басымы шартларында барлыкка килә торган проблемалы мәсьәләләр, аларны хәл итү инструментлары һәм гамәлдәге ярдәм программаларын камилләштерүгә юнәлдерелгән тәкъдимнәр турында фикер алыштылар