«Профессионалитет» стратегик инициативасын тәкъдир итү
22 апрельдә 11:00 сәгатьтә «Энергия» Мәскәү асты көллияте мәйданчыгында «Профессионалитет» стратегик инициативасын тәкъдир итү узачак. Анда Россия Федерациясе Хөкүмәте Рәисе урынбасары Татьяна Голикова, Россия Федерациясе Мәгариф министры Сергей Кравцов, Мәскәү өлкәсе губернаторы Андрей Воробьев, Россия сәнәгатьчеләр һәм эшкуарлар берлегенең һөнәри белем бирү һәм һөнәри квалификация комитеты рәистәше Андрей Комаров һәм «Машина төзелеше фәнни-җитештерү берләшмәсе» Хәрби-сәнәгать корпорациясе» АҖ Генераль директоры Андрей Леонов катнашачак.
Презентация барышында «Профессионалитет»ның ил икътисадына йогынтысы, илебез мәгариф системасын модернизацияләү, белем бирү оешмаларының һәм бизнес-бергәлекләрнең үзара хезмәттәшлеге турындагы мәсьәләләр каралачак.
«Профессионалитет» хезмәт базары таләпләренә туры килә торган кадрларны әзерләүнең яңа тармак моделен төзергә мөмкинлек бирәчәк. Инде 2022 елда Россиянең 42 төбәгендә түбәндәге өстенлекле юнәлешләр буенча 70 белем бирү-җитештерү кластеры булдырылачак: атом сәнәгате, тимер юл транспорты, металлургия, машина төзелеше (шул исәптән авиа - һәм суднолар төзелеше), химия сәнәгате, авыл хуҗалыгы, җиңел сәнәгать һәм фармацевтика тармагы. 2024 елга мондый кластерлар саны 210 га җитәчәк.
Проектның төп инициативаларының берсе – бизнесны мәгариф оешмалары белән партнерлык идарәсенә җәлеп итү, укытуның максималь рәвештә практикага ориентлашуы, кирәкле һөнәрләр буенча кыска вакыт эчендә белгечләр әзерләү. Эш бирүчеләр урта һөнәри белем бирүне үстерүгә инвестициялиләр һәм студентларның гамәли күнекмәләрен формалаштыру өчен база бирәләр.
2022 елда «Профессионалитет» мөмкинлекләреннән 150 мең студент файдалана алачак. Укучылар кыска вакыт эчендә югары квалификацияле эшче белгечлеген ала, производстволарда һөнәргә ярашлы тәҗрибә туплый алачаклар, бу аларны илнең алдынгы тармак компанияләрендә эшкә урнаштыруны гарантияли диярлек. Заманча эш юнәлешләрен үзләштереп, «Профессионалитет»ны тәмамлаучы хыялындагы эшен таба һәм үз эшенең остасы була ала.
Чараның трансляциясен ВКонтакте челтәрендә https://vk.com/nationalprojectsru «Россиянең милли проектлары» рәсми битендә – карарга мөмкин булачак.