ТР Икътисад министрлыгы: Озак саклана торган азык-төлеккә сорау икенче атна инде нормадан түбәнрәк

2022 елның 19 апреле, сишәмбе

Татарстанда озак саклана торган азык-төлеккә ихтыяҗ тотрыкланды. Бүген бу хакта Татарстан Республикасы Президенты Рөстәм Миңнеханов катнашында Татарстан Республикасы Хөкүмәте Йортында узган киңәшмәдә Татарстан Республикасы икътисад министрының беренче урынбасары Рөстәм Сибгатуллин хәбәр итте.

«Россия Федераль Салым хезмәте тарафыннан күрсәтелгән контроль-касса техникасының агымдагы күрсәткечләренә анализ ясау ваклап сату азык-төлек базарында ихтыяҗның тотрыклануын күрсәтә. Озак саклана торган продуктларны сату күләме икенче атна инде эталоннан түбәнрәк», – диде ул.

Аның сүзләренә караганда, Татарстан Республикасы Сәнәгать һәм сәүдә министрлыгы муниципаль берәмлекләр белән берлектә сәүдә челтәрләрендә товар запасларына мониторинг ясауны дәвам итә.

«Кибетләрдә һәм бүлү үзәкләрендә төп товарлар күләме республика халкының ихтыяҗларын канәгатьләндерү өчен җитәрлек. Сәүдә предприятиеләре беренче чиратта кирәкле товарлар белән тәэмин ителгән. Халыкны сыйфатлы продукция белән тәэмин итү максатларында, 19 марттан башлап традицион авыл хуҗалыгы ярминкәләре уздырыла, анда республика халкы арзан бәяләрдән азык-төлек сатып ала ала. Ваклап сату челтәрендә ихтыяҗ дәрәҗәсе тотрыкланды», – дип билгеләп үтте Сибгатуллин.

Аның сүзләренә караганда, Татарстан шәһәрләрендә атна саен ярминкәләр үткәрелә. «Ваклап сату челтәрендә ихтыяҗ дәрәҗәсе тотрыклануга карамастан, кайбер позицияләр буенча ярминкәләргә товарны арттырып китерү күләме саклана әле», – дип билгеләп үтте ул.