Татарстанда бизнесны планлы тикшерү өчен мораторий кертелде
«Без һәрвакыт теләсә нинди административ каршылыкларны киметү һәм республика предприятиеләре өчен максималь уңай шартлар булдыру өстендә эшләдек. Тикшерүгә Федераль мораторий компанияләргә үзләренең төп бурычларына басым ясарга, өзлексез, тотрыклы эш белән тәэмин итәргә мөмкинлек бирә», – дип ассызыклады икътисад министры Мидхәт Шаһиәхмәтов.
Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов ассызыклаганча, бүген иң беренче бурыч – предприятиеләргә ярдәм итү, аларга эшчәнлек алып барырга һәм тикшерүче органнар тарафыннан артык басымсыз эш урыннарын саклап калырга һәм игътибарны физик тикшерүләрдән хокук бозуларны профилактикалауга күчерергә ярдәм итү.
РФ Хөкүмәтенең 336 нчы карары нигезендә 2022 елның 10 мартыннан алып 2022 елның ахырына кадәр барлык дәрәҗәдәге хакимият – федераль, төбәк һәм муниципаль контроль-күзәтчелек органнары тарафыннан бизнеска планлы тикшерүләр үткәрүгә мораторий гамәлдә булачак. Планлаштырылган тикшерүләр гамәлдән чыгарылырга, ә үткәрелә торган тикшерүләр тәмамланырга тиеш.
Мораторий федераль контрольнең (күзәтчелек) 4 төре буенча объектларның ябык исемлегенә кагылмый: санитар-эпидемиология, ветеринария һәм янгын күзәтчелеге, шулай ук сәнәгать куркынычсызлыгы өлкәсе. Шул ук вакытта планлы тикшерү урынына профилактик визит үткәрү рөхсәт ителә.
Законнардагы үзгәрешләр һәм контроль-күзәтчелек органнары һәм эшкуарлык бергәлегенең үзара хезмәттәшлеге буенча мәсьәләләр Татарстан Республикасы Икътисад министрлыгында икътисад үсешен тәэмин итү буенча чаралар планын гамәлгә ашыру мәсьәләсе буенча контрольлек итүче органнар белән утырыш кысаларында фикер алыштылар.
Фикер алышуда контроль-күзәтчелек органнары һәм республика эшкуарлары берләшмәләре җитәкчеләре – Татарстан Республикасы Президенты каршындагы Эшкуарларны яклау буенча вәкаләтле вәкил, Татарстан Республикасы Прокуратурасы, Казан Башкарма комитеты вәкилләре, Татарстан Республикасы Сәүдә-сәнәгать палатасы, «Эшлекле Россия», «РОССИЯ ТЕРӘГЕ», предприятие һәм сәнәгатьчеләр, фермерлар, кече һәм урта бизнес Ассоциацияләре вәкилләре һ. б. катнашты.