ТР Икътисад министрлыгында эшче төркем утырышында Балтач районының үсеш резервларын карадылар

Көн тәртибе буенча фикер алышканчы, муниципалитетларга, торак төзелешен, иҗтимагый инфраструктураны һәм хезмәт урыннары булдыруны да кертеп, территорияләрне комплекслы үстерү кирәклеге, шулай ук 2022-2024 елларга республика муниципаль берәмлекләре социаль-икътисадый үсешен фаразлауның билгеләнгән срокларына юнәлтү турында искәрттеләр.

Моннан тыш, Татарстан Республикасының Туристлык буенча дәүләт комитеты тарафыннан агымдагы елның 25 маеннан башланган балалар өчен туризмда кешбек программасы турында чыгыш ясалды. Программада дәүләт һәм коммерцияле балаларның ял лагерьлары катнаша ала, ләкин стационар булган очракта гына. Палаткалы, шәһәр яки көндезге лагерьлар программада катнашмый. Юлламаны бары тик «Мир» түләү системасының онлайн-картасы белән генә түләп була, ул программа партнерлары: лагерьның үзе, туроператор яки агрегатор сайтларында лояльлек программасында теркәлгән. Кешбэк программаның партнеры сайтында «Мир» картасы буенча узган транзакция суммасына исәпләнә. Түләү суммасының 50% күләмендә, әмма 20 000 сумнан да артмаган күләмдә кире кайтару 5 көн дәвамында автомат рәвештә гамәлгә ашырыла. Яшь буенча чикләүләр юк. Бала яки берничә бала ял итә ала торган сменалар саны да чикләнмәгән. Бер «Мир» картасыннан берничә юллама өчен түләргә мөмкин. Шул ук вакытта «Мир» картасы баланың ата-анасыныкы булырга тиеш.

Татарстан Республикасы икътисадын үстерүне тәэмин итү чараларын гамәлгә ашыру мәсьәләсе буенча Татарстан Республикасы Балтач муниципаль районы Башкарма комитеты җитәкчесенең беренче урынбасары Илшат Галимуллин чыгыш ясады. Шулай ук ТР Авыл хуҗалыгы һәм азык-төлек министрлыгы, ТР Төзелеш, архитектура һәм торак-коммуналь хуҗалыгы министрлыгы, ТР Транспорт һәм юл хуҗалыгы министрлыгы, ТР Хезмәт, халыкны эш белән тәэмин итү һәм социаль яклау министрлыгы, ТР Инвестиция үсеше агентлыгы вәкилләре Балтач районының үсеш резервлары турында чыгышлар ясады.