ТР икътисад министры Мидхәт Шаһиәхмәтов: “Безнең бурыч – дәүләт акчаларын бүлү генә түгел, ә нәтиҗәле эшмәкәрләргә ярдәм итү”

Бу хакта ул Хөкүмәт йортында узган брифингта хәбәр итте. Брифингта шулай ук икътисад министры урынбасары - Эшмәкәрлеккә ярдәм итү департаменты башлыгы Рөстәм Сибгатуллин да катнашты.

Искәртеп үтсәк, агымдагы елның 11 октябрендә ТР Президенты Рөстәм Миңнехановның кече һәм урта эшмәкәрлеккә ярдәм һәм үстерү өлкәләрен дәүләт тарафыннан җайга салу функцияләрен ТР Икътисад министрлыгына тапшыру турындагы Указы дөнья күрде. Узган атнада ТР Хөкүмәтенең Икътисад министрлыгының нигезләмәсенә үзгәрешләр кертү хакындагы карары да чыкты. Шул рәвешле, хәзерге вакытта Татарстанда кече һәм урта эшмәкәрлеккә ярдәм буенча барлык вәкаләтләр һәм функцияләр тулысынча икътисад министрлыгы кулында.

Бүген Хөкүмәт йортында узган брифингта министр Мидхәт Шаһиәхмәтов тапшырылган функцияләрне гамәлгә ашыру өчен министрлык составында Эшмәкәрлеккә ярдәм департаменты төзелүен, аның штатының формалашып бетүен хәбәр итте. Департаментны Рөстәм Сибгатуллин җитәкли. Ул шул ук вакытта ТР икътисад министры урынбасары постын били.

Мидхәт Шаһиәхмәтов министрлыкта эшмәкәрләр өчен финанс-хокукый консультацияләр бүлеге эшли башлавын да хәбәр итте. Эшмәкәрләр әлеге бүлеккә ярдәм программаларын гамәлгә ашыру мәсьәләләре буенча мөрәҗәгать итә ала. “Моңа кадәр эшмәкәрләргә ярдәм буенча гамәлдә булган барлык программалар да эшләячәк, игълан ителгән конкурслар буенча заявкаларны кабул итү дәвам итә”, -ди министр. Хәзер инде заявкалар министрлыкка: Мәскәү урамы, 55 йорт (125 нче кабинет) адресы буенча алына.

Министр ассызыклап узганча, эшмәкәрлеккә ярдәм мәсьәләләре Икътисад министрлыгы эшчәнлегендә яңа юнәлеш түгел. “Бу юнәлеш без моңарчы алып барган инвестицияле, инновацион эшчәнлек, территорияләрне, көндәшлекне үстерү юнәлешләренә органик рәвештә керешеп китәчәк”, -дип саный ул.

“Эшмәкәрлекне үстерү функцияләрен Инвестицион үсеш агентлыгыннан алып министрлыкка тапшыру республикада эшмәкәрләргә ярдәм чараларының кимүенә китермәячәк. Быел бу максатларга федераль һәм республика казналарыннан каралган ярдәм күләме 1 млрд сумнан артып китә. Алынган бер генә заявка да игътибардан читтә калмаячак”, - дип ышандырды министр.

Мидхәт Шаһиәхмәтов ассызыклаганча, хәзер бурыч – программалар буенча дәүләт акчаларын бүлү генә түгел, аның эшмәкәрләргә нәтиҗәле ярдәм итүенә ирешү. Эшне системага салу, эшмәкәрләргә ярдәм чараларының ачыклыгын тәэмин итү максатыннан, республикада кече һәм урта эшмәкәрлек субъектларына ярдәм итү һәм исәпкә алуның бердәм системасы төзеләчәк. Ул барлык программалар буенча заявкаларны электрон формада кабул итү системасын, заявкаларның бердәм реестрын, заявкаларны бәяләү критерийларының ачык системасын, эшмәкәрлеккә ярдәм чараларының республика буенча үзәкләштерелгән базасын үз эченә алачак. Мидхәт Шаһиәхмәтов киләчәктә республикада кече инновацион компанияләргә дәүләт ярдәме мәсьәләсенең каралачагын да җиткерде.

“Татар-информ” материаллары буенча.