Мобилизацияләнгән гражданнар өчен кредит каникуллары турындагы законга кул куелды

РФ Президенты РФ Кораллы Көчләрендә мобилизация буенча хәрби хезмәткә чакырылган затлар, махсус хәрби операциядә катнашучы затлар, шулай ук аларның гаилә әгъзалары тарафыннан кредит шартнамәләре (заем шартнамәләре) буенча йөкләмәләрне үтәү үзенчәлекләре турындагы законга кул куйды (2022 елның 7 октябрендәге 377-ФЗ номерлы Федераль закон). Закон басылып чыккан көненнән үз көченә керде.

Аерым алганда, заемчы кредит шартнамәсенең гамәлдә булуы дәвамында теләсә кайсы вакытта, әмма 2023 елның 31 декабреннән дә соңга калмыйча, заемчы тарафыннан ташламалы чорга үз йөкләмәләрен үтәүне туктату таләбе белән кредиторга мөрәҗәгать итәргә хокуклы, дип күрсәтелә. Мондый чор – 30 көнгә озынайтылган мобилизация вакыты яки контракт төзелгән вакыт, яки 30 көнгә озынайтылган махсус хәрби операциядә катнашу вакыты була.

Кредит каникуллары бирү өчен, заемчының махсус хәрби операциядә катнашуын раслый торган документларны теркәп, кредиторга таләп җибәрергә кирәк. Документлар 10 көн эчендә каралачак. Шул ук вакытта кредит каникулларын бирүдән баш тарту заемчыны мобилизацияләү факты яки аның махсус хәрби операциядә катнашуы расланмаган очракта гына мөмкин.