Татарстан эшкуарлары 25,3 млрд. сумлык федераль һәм республика ярдәм чаралары алдылар

Республика эшкуарларына санкцияләр шартларында 25,3 млрд сумлык федераль һәм республика ярдәм чараларын алуга 2328 заявка хупланды. Бу хакта бүген ТР Хөкүмәте Йортында узган республика киңәшмәсендә ТР Премьер-министры урынбасары – ТР икътисад министры Мидхәт Шаһиәхмәтов сөйләде.

Кече һәм урта бизнес өчен кредит бирүнең дүрт ташламалы программасы эшли – КУЭ Корпорациясе һәм Россия Үзәк банкы белән берлектә гамәлгә ашырыла торган «ПСК Инвестиция»; РФ ҮБ тарафыннан гамәлгә ашырыла торган «Оборотная», Россия Икътисадый үсеш министрлыгы тарафыннан башлап җибәрелгән «1764» кредит бирүне субсидияләү программасы; авыл хуҗалыгы җитештерүчеләре өчен Россия Федерациясе авыл хуҗалыгы министрлыгы линиясе буенча «1528» программасы буенча ташламалы кредит бирү каралган.

Кредитлар буенча ставкалар кече предприятиеләр өчен – елына 15 % тан, ә урта предприятиеләр өчен 13,5 % тан да югары түгел. Авыл хуҗалыгы җитештерүчеләре өчен ставка 5% ка тигез.

Моннан тыш, эшкуарлар кредит каникулыннан һәм кредитларны реструктуризацияләүдән файдалана алалар.

Шул исәптән эшкуарлар кризиска каршы пакет кысаларында кабул ителгән 530 млн сумлык республика финанс ярдәм чаралары алдылар. Хәзер 7 микрофинанс программасы тормышка ашырыла. Ташламалы программалар буенча ставкалар 0,1 % тан 13,5 % ка кадәр тәшкил итә. 

Ташламалы кредитларга гаризалар кабул итү дәвам итә.

Республика эшкуарлары, барлык гамәлдәге ярдәм чаралары буенча консультацияләр алу өчен, 8(843)524-90-90 телефонына шалтыратып мөрәҗәгать итә алалар.